అరెస్ట్ లతో అడ్డుకోలేరు : రాహుల్ ట్వీట్

న్యూఢిల్లీ : అరెస్ట్‌లతో కాంగ్రెస్‌ ప్రభంజనాన్ని టీఆర్‌ఎస్‌ అడ్డుకోలేదని ఆ పార్టీ అధ్యక్షుడు రాహుల్‌ గాంధీ స్పష్టం చేశారు. రేవంత్‌రెడ్డి అరెస్ట్‌పై ఆయన ట్విటర్‌లో స్పందించారు. కేసీఆర్‌ నిరంకుశ ధోరణికి పరాకాష్టే రేవంత్‌ రెడ్డి అరెస్ట్‌ అని దుయ్యబట్టారు. టీఆర్‌ఎస్‌ ప్రజా వ్యతిరేక పాలనకు రోజులు దగ్గర పడ్డాయని, ఓటమి భయం వల్లే రేవంత్‌ను అరెస్ట్‌ చేశారని మండిపడ్డారు. టీఆర్‌ఎస్‌ను ప్రజలు చిత్తుగా ఓడించాలని పిలుపునిచ్చారు.మంగళవారం కొడంగల్‌ నియోజకవర్గం కోస్గిలో టీఆర్‌ఎస్‌ అధినేత కేసీఆర్‌ బహిరంగ సభ దృష్య్టా రేవంత్‌ నిరసనలకు పిలుపునిచ్చిన విషయం తెలిసిందే. ఈ నేపథ్యంలో ఎలాంటి అవాంఛనీయ సంఘటనలు తలెత్తకుండా.. పోలీసులు ముందుస్తుగా తెల్లవారుజామున ఆయన నివాసంలో అదుపులోకి తీసుకున్నారు. ఈ అరెస్ట్‌పై నిరసనలు తలెత్తడంతో ఆయనను విడుదల చేయాలని  రాష్ట్ర ముఖ్య ఎన్నికల అధికారి రజత్‌ కుమార్‌ డీజీపీని ఆదేశించారు. దీంతో పోలీసులు భారీ బందోబస్తు మధ్య ఆయనను జడ్చర్ల పోలీస్‌ ట్రైనింగ్‌ సెంటర్‌ నుంచి కొడంగల్‌కు తరలించారు.

రేవంత్ రెడ్డి అరెస్ట్ తో వేడెక్కిన వాతావరణం

రేవంత్ రెడ్డి అరెస్ట్‌తో తెలంగాణలో ఎన్నికల వాతావరణం ఒక్కసారిగా వేడెక్కింది. అధికార టీఆర్ఎస్ అరాచకానికి పరాకాష్ఠగా దీన్ని కాంగ్రెస్ అభివర్ణించింది. ఈ వ్యవహారంపై రేవంత్ సతీమణి గీత మీడియాతో మాట్లాడుతూ.. నా భర్తను అరెస్ట్‌ చేసిన పోలీసులు ఎక్కడికి తరలించారో చెప్పాలని డిమాండ్‌ చేశారు. ముందస్తు చర్యల్లో భాగంగానే అరెస్ట్‌ చేశామని పోలీసులు చెప్పడం లేదని ఆమె ఆవేదన వ్యక్తం చేశారు. ఎనిమిది గంటల నుంచి ఓపికగా ఉన్నామని.. కుటుంబసభ్యులతో పాటు అనుచరులు, అభిమానుల్లో ఆందోళన నెలకొందని ఆమె పేర్కొన్నారు. ఎన్నికలు ప్రశాంతంగా జరగాలనే తాము కొరుకుంటున్నామని, ఆయనను తీసుకెళ్లింది పోలీసులో? కాదో తామెలా నిర్ధరించుకోవాలని గీత నిలదీశారు. స్థానిక పోలీసులైతే హెల్మెట్లు ధరించి ఎందుకు వచ్చారని, ఐడీ కార్డులు, అరెస్ట్‌ వారెంట్ కూడా చూపించకుండా రేవంత్‌ను తీసుకెళ్లారని వాపోయారు. తీసుకెళ్లింది పోలీసులే అయినప్పుడు ఎక్కడున్నారో చెప్పడానికి ఇబ్బందేంటని ఆమె ప్రశ్నించారు. కార్యకర్తలంతా సంయమనంతో ఉన్నారని, రేవంత్‌ ఎక్కడున్నారో చెప్పాలని ఆమె డిమాండ్‌ చేశారు. కుటుంబసభ్యులుగా రేవంత్‌ క్షేమసమాచారం గురించి తెలుసుకోవాల్సిన బాధ్యత తమకు లేదా అని ప్రశ్నించారు. మరోవైపు ఈ వ్యవహారాన్ని సీరియస్‌‌గా తీసుకున్న కాంగ్రెస్.. హైకోర్టును ఆశ్రయించి లంచ్‌మోషన్‌‌ పిటిషన్ దాఖలు చేసింది. అయితే, కోర్టు దీనిపై ఎలా స్పందిస్తుందోనని సర్వత్రా ఆసక్తి నెలకొంది. అలాగే రేవంత్ రెడ్డి అరెస్ట్‌కు నిరసనగా పెద్దఎత్తున కార్యకర్తలు ఆయన ఇంటి వద్దకు చేరుకుని ఆందోళనకు దిగారు. పోలీసులకు వ్యతిరేకంగా నినాదాలు చేస్తున్నారు. రేవంత్‌ను అరెస్ట్ చేసి ఎక్కడికి తీసుకువెళ్లారో కూడా చెప్పడం లేదంటూ నిలదీశారు. రేవంత్‌ సోదరులను కూడా అరెస్ట్ చేయడం నిరంకుశ పాలనకు నిదర్శమని మండిపడ్డారు. ప్రభుత్వం కుట్ర పూరితంగా వ్యవహరస్తోందని, ఎన్ని కుట్రలు పన్నినా రేవంత్ రెడ్డి గెలుపు ఆపలేరని కార్యకర్తలు ధీమా వ్యక్తం చేశారు. కోస్గిలో జరిగే సీఎం సభను అడ్డుకుంటామని రేవంత్‌రెడ్డి ప్రకటించడంతోనే ముందస్తుగా అరెస్ట్‌ చేశామని పోలీసులు తెలిపారు. శాంతిభద్రతలకు విఘాతం కలగకుండా ఉండేందుకే ఈ చర్య తీసుకున్నామని పేర్కొన్నారు. రేవంత్‌ మహబూబ్‌నగర్‌ ప్రాంతంలో పోలీసుల అదుపులోనే సురక్షితంగా ఉన్నారని చెప్పారు. వికారాబాద్‌ పోలీసుల ఆధ్వర్యంలోనే రేవంత్‌ అరెస్ట్‌ జరిగిందని వెల్లడించారు.

You May Also Like

Leave a Reply

Your email address will not be published. Required fields are marked *