గోల్డ్ రిటర్న్స్ తో ఇన్వెస్టర్ల హ్యాపీ

ఇన్వెస్ట్ చేయడానికి మార్కెట్‌లో చాలా పెట్టుబడి సాధనాలు అందుబాటులో ఉన్నాయి. కొందరు ఈక్విటీల్లో, మరికొందరు బాండ్లలో, ఇంకొందరు బంగారం ఇన్వెస్ట్ చేస్తుంటారు. ఎందులో ఇన్వెస్ట్ చేసినా లక్ష్యం మాత్రం ఒక్కటే. అదే రాబడి. 2018లో స్టాక్ మార్కెట్లు చెప్పుకోదగ్గ రాబడులను అందించలేదు. అయితే బంగారం మాత్రం దేశీ ఇన్వెస్టర్లకు మంచి రిటర్న్స్‌నే అందించింది. పసిడి ధర 8 శాతం మేర పెరిగింది. అంతర్జాతీయ అనిశ్చిత పరిస్థితులు, వాణిజ్య ఉద్రిక్తతలు, డాలర్ క్షీణత వంటి అంశాలు ఇందుకు ప్రధాన కారణం. భారత్, చైనా దేశాల్లో బంగారం వినియోగం కూడా పసిడి ధరలను ప్రభావితం చేయనుంది. భారత్‌లో బంగారం ఎక్కువగా దిగుమతి అవుతుంది. రూపాయి బలహీనంగా ఉండటం వల్ల పసిడి ధరలు పెరిగాయి. భౌగోళిక రాజకీయ ఉద్రిక్తతలు పెరిగే అంచనాలున్నాయి. ఇదే జరిగితే బంగారం ధరలు అధిక స్థాయిల్లోనే కదలాడవచ్చు. ప్రస్తుతం వాణిజ్య యుద్ధానికి సంబంధించి తాత్కాలిక ఒప్పందం కుదిరినప్పటికీ.. సమస్య మాత్రం ఇంకా సమసిపోలేదు. అస్థిర పరిస్థితులలో బంగారం మంచి ఇన్వెస్ట్‌మెంట్ సాధనంగా పనిచేస్తుంది. అంతర్జాతీయ మార్కెట్‌లో బంగారం ధర ఔన్స్‌కు 1,450 డాలర్లకు చేరొచ్చని ఐఐఎఫ్ఎల్ కమోడిటీ అనలిస్ట్ రితేశ్ పటేల్ అంచనా వేశారు. దేశీ మార్కెట్‌లో 10 గ్రాముల బంగారం ధర రూ.35,500లకు పెరగొచ్చని తెలిపారు. అందువల్ల బంగారంపై పెట్టుబడులను కొనసాగించవచ్చని సలహా ఇచ్చారు. పోర్ట్‌ఫోలియోలో బంగారం వాటా 5-10 శాతం ఉండేలా చూసుకోవాలని సూచించారు. 2019లో రేట్ల పెంపు మూడు సార్లు ఉండొచ్చని గతంలో పేర్కొన్న ఫెడ్‌ అధికారులు.. డిసెంబర్‌లో రెండు సార్లు మాత్రమే రేట్ల పెంపు ఉండొచ్చని సంకేతాలివ్వడం బంగారానికి సానుకూల అంశం. వడ్డీ రేట్లు పెరగకపోతే.. అప్పుడు డాలర్‌పై ఒత్తిడి నెలకొంటుంది. అమెరికా ఆర్థిక వ్యవస్థ వృద్ధి రేటు నెమ్మదిస్తే.. అది పసిడికి బలానిస్తుంది.

You May Also Like

Leave a Reply

Your email address will not be published. Required fields are marked *