తీవ్ర సంక్షోభంలో రాష్ట్ర వ్య‌వ‌సాయ రంగం

– దేశ స‌గ‌టు క‌న్నా త‌గ్గిన రాష్ట్ర సాగు విస్తీర్ణం
: కూట‌మి ప్రభుత్వంపై ఎంవీయ‌స్ నాగిరెడ్డి ఫైర్

తాడేప‌ల్లి లోని పార్టీ కేంద్ర కార్యాల‌యంలో మీడియాతో మాట్లాడిన వైయ‌స్సార్సీపీ జ‌న‌ర‌ల్ సెక్ర‌ట‌రీ (అగ్రిక‌ల్చ‌ర్ అండ్ ఫార్మ‌ర్స్ వెల్ఫేర్‌) ఎంవీయ‌స్ నాగిరెడ్డి

– రూ.13,324 కోట్లు న‌ష్ట‌పోయిన వ‌రి, ప‌త్తి, మొక్క‌జొన్న రైతులు
– ధ‌ర‌లు ప‌తనం, మొంథా తుపాన్‌తో రూ. 9,209 కోట్లు న‌ష్ట‌పోయిన ప‌త్తి రైతు
– రాయ‌ల‌సీమ‌లో ప్ర‌మాద ఘంటిక‌లు మోగిస్తున్న హార్టీక‌ల్చ‌ర్ సాగు
– ట‌మాట‌, చీనీ, అర‌టి పంట‌ల‌కు క‌నీస‌ మ‌ద్ధ‌తు ధ‌ర‌లు క‌రువు
– గిట్టుబాటు కాక పంట‌ల‌ను రోడ్ల‌పై పార‌బోస్తున్న రైతులు

తాడేప‌ల్లి:

తుపాన్‌ల ప్ర‌భావం, గిట్టుబాటు ధ‌ర‌లు లేక రైతులు తీవ్రంగా న‌ష్ట‌పోతున్నార‌ని, రాష్ట్రంలో వ్య‌వ‌సాయ‌ రంగం తీవ్ర‌మైన సంక్షోభంలో కూరుకుపోయింద‌ని వైయ‌స్సార్సీపీ జ‌న‌ర‌ల్ సెక్ర‌ట‌రీ (అగ్రిక‌ల్చ‌ర్ అండ్ ఫార్మ‌ర్స్ వెల్ఫేర్‌) ఎంవీయ‌స్ నాగిరెడ్డి ప్రభుత్వాన్ని హెచ్చ‌రించారు. తాడేప‌ల్లి లోని పార్టీ కేంద్ర కార్యాల‌యంలో ఆయ‌న మీడియాతో మాట్లాడుతూ రైతుల‌ను ఆదుకోవాల్సిన ప్ర‌భుత్వం ఆ ప‌నులు ప‌క్క‌న‌పెట్టి రైతు స‌మ‌స్య‌ల‌ను ప్ర‌భుత్వం దృష్టికి తీసుకొచ్చిన ప్ర‌తిప‌క్ష నాయ‌కుడిపై వ్య‌క్తిగ‌త విమ‌ర్శ‌లు చేస్తూ డైవ‌ర్ష‌న్ పాలిటిక్స్ చేస్తోంద‌ని ఆయ‌న మండిప‌డ్డారు. దేశ స‌గ‌టుక‌న్నా రాష్ట్ర స‌గ‌టు సాగు విస్తీర్ణం ప‌డిపోయినా ఈ ప్ర‌భుత్వం మేల్కోవ‌డం లేద‌ని, మొంథా తుపాన్ కార‌ణంగానైతేనేమీ, మ‌ద్ధ‌తు ధ‌ర‌లు లేక‌పోవ‌డం వ‌ల్ల‌నైతేనేమీ రాష్ట్రంలో మూడు ప్ర‌ధాన పంట‌లు వ‌రి, ప‌త్తి, మొక్క‌జొన్న సాగుచేస్తున్న రైతులు ఈ ఏడాది రూ.13,324 కోట్లు న‌ష్ట‌పోయార‌ని ధ్వ‌జ‌మెత్తారు. కేవలం ప‌త్తిరైతులే రూ. 9,209 కోట్లు న‌ష్ట‌పోయార‌ని ఆవేద‌న వ్య‌క్తం చేశారు. ట‌మాట‌, చీనీ, అర‌టి పంట‌ల‌కు క‌నీస‌ మ‌ద్ధ‌తు ధ‌ర‌లు క‌రువై పంట‌ల‌ను రోడ్డుపై పార‌బోస్తున్న ప‌రిస్థితులు రాయ‌ల‌సీమ‌లో ప్ర‌మాద ఘంటిక‌లు మోగిస్తున్నాయ‌ని హెచ్చ‌రించారు. సాధార‌ణ పంట‌ల‌తో పోల్చితే హార్టీ క‌ల్చ‌ర్ సాగు విస్తీర్ణం త‌క్కువే అయిన‌ప్ప‌టికీ జీఎస్‌డీపీలో మాత్రం మెజారిటీ వాటా పండ్ల తోట‌ల‌దే అన్న విష‌యాన్ని ఈ ప్రభుత్వం విస్మ‌రిస్తోంద‌ని తెలిపారు. ఇప్ప‌టికైనా ప్ర‌భుత్వం మేల్కొని రైతుల‌కు మేలు చేసే కార్య‌క్ర‌మాల‌పై దృష్టిపెట్టాల‌ని హిత‌వు ప‌లికారు. ఆయ‌న ఇంకా ఏమ‌న్నారంటే…

● 11 లక్ష‌ల ఎక‌రాల్లో వ‌రి పంట న‌ష్టం

మొంథా తుపాన్ కార‌ణంగా అన్ని పంట‌లు క‌లిపి 4 ల‌క్ష‌ల ఎక‌రాల్లోనే దెబ్బ‌తిన్న‌ట్టు ప్ర‌భుత్వం చెబుతోంది. వాస్త‌వానికి మొంథా తుపాన్ ముందు వ‌ర‌కు రాష్ట్రంలో వ‌రి సాగు బాగానే ఉన్నా త‌ర్వాత బాపట్ల నుంచి శ్రీకాకుళం వ‌ర‌కు 28 ల‌క్ష‌ల ఎక‌రాలు తుపాన్ ప్ర‌భావిత‌మై ఉన్నాయి. అందులో 11 ల‌క్ష‌ల ఎక‌రాల్లో దిగుబ‌డులు ప‌డిపోతున్నాయ‌ని గ‌తంలోనే మా పార్టీ అధ్య‌క్షులు వైయ‌స్ జ‌గ‌న్ గారు చెప్ప‌డం జ‌రిగింది. ఒక్క వ‌రిలోనే 11 ల‌క్ష‌ల ఎక‌రాల్లో పంటదెబ్బ‌తింటే అన్నిపంట‌లూ క‌లిపి 4 ల‌క్ష‌ల ఎక‌రాల్లో దెబ్బ‌తిన్నాయ‌ని ప్ర‌భుత్వం చెబుతోంది. 83 ల‌క్ష‌ల ట‌న్నుల ఉత్ప‌త్తి కూడా 73 నుండి 74 ల‌క్ష‌ల ట‌న్నుల‌కు ప‌డిపోబోతోంది. 33 శాతం పైన పంట దెబ్బ‌తింటేనే ఇన్‌పుట్ స‌బ్సిడీకి అర్హ‌త ఉందంటున్నారు. అంత‌క‌న్నా త‌క్కువ నష్టం జ‌రిగిన రైతుల గురించి చెప్ప‌డం లేదు. 83 ల‌క్ష‌ల ట‌న్నుల ధాన్యం దిగుబ‌డి వ‌చ్చే ప‌రిస్థితి ఉంద‌ని ప్ర‌భుత్వం అంచ‌నా వేస్తున్న‌ట్టు, అందులో 51 ల‌క్ష‌ల ట‌న్నులు సేక‌రిస్తామ‌ని చెబుతున్నారు. గ‌త ర‌బీ సీజ‌న్‌లో ఏప్రిల్ తరువాత నాలుగు నెల‌ల‌పాటు డబ్బులు ఇవ్వ‌కున్నా 24 గంట‌ల్లోనే డ‌బ్బులిస్తున్న‌ట్టు పౌర‌స‌ర‌ఫ‌రాలశాఖ మంత్రి నాదెండ్ల మ‌నోహ‌ర్ చెప్ప‌డం హాస్యాస్ప‌దం. ఈ దిగుబడి మోన్థా తుపాన్ కారణం గా ఉత్పత్తి తగ్గడం..సేకరణ కూడా 36 నుండి 37 లక్షల టన్నులు దాటదు..

● వరి రైతుకి రూ.2579 కోట్లు న‌ష్టం

కళ్లాల్లో ధాన్యం..కళ్లల్లో దైన్యం! పేరుతో తెలుగుదేశం పార్టీ అనుకూల ప‌త్రిక ఈనాడులోనే రాశారు. తేమ పేరుతో బస్తాకు 4 నుంచి 8 కిలోల కోత. ధర, తరలింపుపై రైతులే మిల్లర్లతో మాట్లాడుకోవాల్సిన దుస్థితి.. నిమిత్తమాత్రులుగా రైతు సేవా కేంద్రాల సిబ్బంది అంటూ ప్ర‌భుత్వ అస‌మ‌ర్థ‌త‌ను తెలిపేలా రాశారు. ఇన్ని రోజులుగా వైయ‌స్సార్సీపీ రైతుల ప‌క్షాన చెబుతున్న మాటల‌నే య‌థావిధ‌గా ఈనాడు కూడా రాసిందంటే ఎంత ద‌యనీయ ప‌రిస్థితులు ఉంద‌నేది తెలిసిపోతుంది. రైతు సేవా కేంద్రాల్లోని సిబ్బంది అంతా మిల్లర్లకే అప్పగించారు. ధాన్యం నూర్పిడి చేయిస్తే రైతే.. మిల్లరు దగ్గరికి వెళ్లి నమూనా చూపించి, ధర మాట్లాడుకోవాలి. తేమ 17% కంటే ఎక్కువ ఉంటే.. ఒక శాతానికి 2 కిలోల చొప్పున అదనంగా ధాన్యం అడుగు తున్నారు. అందుకు అంగీకరిస్తేనే ధాన్యం మిల్లుకు తరలే అవకాశం ఉంటోంది. ఇంత జరిగాకా.. రైతు సేవా కేంద్ర సిబ్బంది వచ్చి.. ధాన్యాన్ని మద్దతు ధరకు విక్రయించినట్లు చూపిస్తున్నారు. ఎక్క‌డకెళ్లినా గ‌న్నీ సంచులు దొర‌క‌డం లేదు. రవాణా చేద్దామంటే లారీలు లేవంటున్నారు. 75 కిలోల బస్తాకు మద్దతు ధర ప్రకారం రూ.1,777 దక్కాల్సి ఉంటే.. రైతుకు సగటున రూ.1,450 మాత్రమే లభిస్తోంది. మొంథా తుపాను దెబ్బకు వరి నేల వాలింది. కోత ఖర్చులు మూడు రెట్లు పెరిగాయి. సాధారణంగా ఎకరం గంటలో కోయొచ్చు. కానీ, తుపానుకు వరి పడిపోవడంతో 2 నుంచి 3 గంటలవుతోంది. దీంతో ఎకరం వరి కోతకు సుమారు రూ.10 వేల వరకు వెచ్చించాల్సి వస్తోంది. ఈ విష‌యాల‌నే మాజీ ముఖ్య‌మంత్రి వైయ‌స్ జ‌గ‌న్ గారు ప్ర‌స్తావిస్తే దానికి స‌మాధానం చెప్ప‌కుండా ఆయ‌న్ను వ్య‌క్తిగ‌తంగా విమ‌ర్శిస్తున్నారు. ఈనాడు చెప్పే లెక్క‌ల ప్ర‌కారమే రైతు బ‌స్తాకు రూ.250 లు న‌ష్ట‌పోతున్నాడు. ఈ లెక్క‌న ఒక్క ధాన్యం మీద‌నే రూ.2579 కోట్లు వరి రైతు నష్ట‌పోతున్నాడు. ఇంత సంక్షోభం ఉంటే ప్ర‌భుత్వం ప‌ట్టించుకోవ‌డం లేదు. వ‌రిని సాగుచేస్తున్న రైతులు ఎక్కువ పేద కవులు రైతులే. అప్పులు తెచ్చి పంట‌లు సాగు చేస్తున్నారు.

● ప‌త్తి రైతు న‌ష్టం రూ.9,209 కోట్లు

ఈ ఏడాది ప‌త్తి రైతులు ఎదుర్కొన్నంత‌టి సంక్షోభం గతంలో ఎప్పుడు జ‌రగ‌లేదు. లాంగ్ స్టేబుల్ కాట‌న్‌కి క్వింటాల్‌కి మ‌ద్ధ‌తు ధ‌ర రూ. 8110 లు ఉండ‌గా ద‌ళారులు క్వింటాల్‌ 5 వేలకిస్తారా…6 వేలకిస్తారా? అని గ్రామాల్లో పత్తి రైతులతో ద‌ళారులు బేరాలాడుతున్నారు. ధ‌ర త‌గ్గిన కార‌ణంగా సగటున క్వింటాల్‌కు రూ.2,500 న‌ష్ట‌పోతున్నాడు. దిగుబడి ఎకరాకు 12 క్వింటాళ్లైనా వస్తుందని ఆశిస్తే.. సగటున 4 క్వింటాళ్లే వస్తోంది. ఈ విధంగా దిగుబ‌డి పడిపోవ‌డం వ‌ల్ల ఎక‌రాకు రూ. 70,480 వేలు న‌ష్ట‌పోతున్నాడు. ధ‌ర ప‌డిపోవ‌డం వ‌ల్ల ఎక‌రాకి రూ. 11240లు న‌ష్ట‌పోతున్నాడు. మొత్తంగా ఎక‌రాకు రూ. 81,720 లు న‌ష్ట‌పోతున్నాడు. పంట పండిచిన 4 క్వింటాళ్ల‌కు రూ.6 వేల లెక్క‌న వ‌స్తే రూ.24 వేలే వ‌స్తుంది. రాష్ట్రంలో ఈ ఏడాది 11.27 లక్షల ఎకరాల్లో పత్తి సాగైంది. ఇందులో దాదాపు స‌గం 5.6 లక్షల ఎకరాలు కర్నూలు జిల్లాలోనే ఉంది. పల్నాడు జిల్లాలో 2.27 లక్షల ఎకరాల్లో వేశారు. తర్వాత స్థానాల్లో ఎన్ టి ఆర్, అనంతపురం, గుంటూరు, ప్రకాశం జిల్లాలున్నాయి. ఈ లెక్క‌న ఎక‌రాకు రూ. 81,720 చొప్పున రూ. 9,209 కోట్లు ప‌త్తి రైతు న‌ష్ట‌పోతున్నాడు. సీసీఐ కేంద్రాల్లో తేమ ఉంది, రంగు మారిందంటూ సతాయిస్తున్నార‌ని తెలుగుదేశం అనుకూల ప‌త్రిక‌లు ఈనాడు, ఆంధ్ర‌జ్యోతిలే రాస్తున్నాయి. క‌ఠినత‌రమైన సీసీఐ నిబంధ‌న‌ల కార‌ణంగా బ‌య‌ట వ్యాపారుల‌కే అమ్ముకుంటున్నార‌ని రాస్తున్నాయి.

● మొక్క‌జొన్న పంట మీద న‌ష్టం రూ.1,536 కోట్లు

మొక్క‌జొన్న పంట‌ను 4.62 ల‌క్ష‌ల ఎక‌రాల్లో సాగు చేస్తే 8 ల‌క్ష‌ల ట‌న్నుల ఉత్ప‌త్తి జ‌రుగుతుంద‌ని ప్ర‌భుత్వం అంచనా వేస్తోంది. కేంద్ర ప్ర‌భుత్వం ప్ర‌క‌టించిన మ‌ద్ధ‌తు ధ‌ర రూ. 2400 లు కాగా ఈనెల 19 నాటికి కొనుగోలు కేంద్రాలు కొనుగోళ్లు ప్రారంభించ‌లేదు. దీంతో రూ.1800 నుండి 1900 ల‌కు బ‌య‌ట వ్యాపారుల‌కు అమ్ముకుంటూ క్వింటాల్‌కి రూ. 500 వ‌ర‌కు న‌ష్ట‌పోతున్నాడ‌ని చెప్ప‌డం జ‌రిగింది. ఈవిధంగా రూ.400 కోట్ల వ‌ర‌కు మొక్క‌జొన్న రైతు న‌ష్ట‌పోతున్నాడ‌ని ప్ర‌భుత్వాన్ని హెచ్చ‌రించాం. ఈరోజు చూస్తే రూ.1650ల‌కు కూడా కొనుగోళ్లు జ‌ర‌గ‌డం లేదు. ఎక‌రాకి 5 క్వింటాళ్ల దిగుబ‌డి త‌గ్గిపోయిన కార‌ణంగా క్వింటాల్‌కి రూ. 2400 చొప్పున ఒక్కో ఎక‌రాకు రూ. 12వేలు దిగుబ‌డి త‌గ్గిపోయింది. దీనికితోడు ఎక‌రాకు రూ.800 చొప్పున మ‌ద్ధతు ధ‌ర లేని కార‌ణంగా రూ. 33,250లు త‌గ్గిపోయింది. మొత్తంగా మొక్క‌జొన్న పంట మీద రూ. 1536 కోట్లు న‌ష్ట‌పోతున్నారు. ఇప్పటికి కొనుగోలు కేంద్రాలు ప్రారంభించలేదు.. మొత్తంగా ఈ మూడు వ‌రి, ప‌త్తి, మొక్క‌జొన్న పంటల్లోనే రూ. షుమారుగా 13,324 కోట్లు రైతులు న‌ష్ట‌పోతున్నారు. తుపాన్ కార‌ణంగా త‌గ్గిన ఉత్ప‌త్తి వ‌ల‌న అయితేనేమీ, ప్ర‌భుత్వం ప్ర‌క‌టించిన మ‌ద్ధ‌తు ధ‌ర ద‌క్క‌ని కార‌ణంగా ఈ మొత్తం రైతులు న‌ష్ట‌పోయారు.

మూడోవంతు ప‌డిపోయిన వేరుశెన‌గ సాగు..
వేరుశెన‌గ పంట‌సాగు ల‌క్ష్యం 14.13ల‌క్ష‌ల ఎక‌రాలుకాగా, 5.14 ల‌క్ష‌ల ఎక‌రాల్లోనే పంట‌సాగైంది. రాయ‌ల‌సీమ‌లో ప్ర‌ధాన పంట‌గా ఉన్న వేరుశెన‌గ సాగు ఇంత‌తీవ్రంగా ప‌డిపోతే రైతులు ఏం కావాలి. ఆ ప్రాంతంలో ప‌శుగ్రాసంగా వేరుశెన‌గ‌ను వాడ‌తారు. ఇప్పుడు పంట సాగు పడిపోవడం దిగుబ‌డి లేని కార‌ణంగా పశువుల‌ను మేపే ప‌రిస్థితులు క‌నిపించ‌డం లేదు. పైగా పండిన అర‌కొర పంట‌కు కూడా గిట్టుబాటు ధ‌ర‌లు ద‌క్క‌డం లేదు. వేరుశెన‌గ స‌రిగా పండ‌క పోతే ప‌శువుల‌కు ప‌శుగ్రాసం కూడా దొరక్క పశువులను అమ్మేసుకుని రాయ‌ల‌సీమ ప్రాంతం నుంచి మ‌ళ్లీ వ‌ల‌స‌లు పెరుగుతాయి..
స‌జ్జ పంట‌కు మ‌ద్ధ‌తు ధ‌ర రూ.2750 అయితే రూ. 1800ల‌కు మించి ప‌ల‌క‌ లేదు. మినుము ప‌రిస్థితి కూడా అలాగే ఉంది. గ‌తేడాది రబీ లో పండిన‌ శెన‌గ పంట‌ను కోల్డ్ స్టోరేజీల్లో ఉంటే ఇప్పటికీ రూ.5200ల‌కు అమ్ముకోవాల్సి వస్తోంది.

● అర‌టి పంట‌కు ఇన్సూరెన్స్ ఇచ్చాం

వీటితో పాటు పండ్ల తోటల ప‌రిస్థితి కూడా అంతే అధ్వాన్నంగా తయారైంది. అర‌టి కిలో రూపాయికి అమ్ముకోలేక ట్రాక్ట‌ర్ల‌లో తీసుకెళ్లి మేక‌ల‌కు మేత‌గా వేసిన ప‌రిస్థితులు చూస్తుంటే గుండె త‌రుక్కుపోతుంది. అర‌టి రైతుల‌ను ఆదుకోవాల‌ని ప్ర‌తిప‌క్ష నాయ‌కుడు వైయ‌స్ జ‌గ‌న్ గారు మొత్తుకున్నా ఈ ప్ర‌భుత్వం మొద్దునిద్ర వీడ‌టం లేదు. రైతు బాధ ఈ ప్ర‌భుత్వానికి ప‌ట్టడం లేదు. 74 ల‌క్ష‌ల ట‌న్నులు ఏపీలో ఉత్ప‌త్తి జ‌రుగుతోంది. దేశ రాజ‌ధానికి అత్యుత్తమైన పంటను అందిస్తున్న‌ రైతులు మ‌న‌వాళ్లే. అనంత‌పూర్‌, క‌డ‌ప రైతులు పండించిన అర‌టి పంట‌లే ఢిల్లీ మార్కెట్‌లో ఎక్కువ‌గా అమ్మ‌కాలు జరుగుతాయి. అర‌టి రైతుల‌కు మ‌ద్ధ‌తు ధ‌ర క‌ల్పించ‌మ‌ని ప్ర‌భుత్వాన్ని ప్ర‌శ్నిస్తుంటే కూట‌మి ప్ర‌భుత్వం బాధ్య‌త లేకుండా అర‌టి పంట‌కు వైయ‌స్సార్సీపీ హ‌యాంలో ఇన్సూరెన్స్ జ‌ర‌గ‌లేద‌ని ప్ర‌చారం చేస్తుంది. మామిడి, అర‌టి, చీనీ, దానిమ్మ వంటి పండ్ల తోట‌ల‌కు వైయ‌స్సార్సీపీ హ‌యాంలో ఇన్సూరెన్స్ క‌వ‌రేజీ ఉంద‌ని ప్ర‌భుత్వ వెబ్‌సైట్ చెబుతున్నా లేద‌ని అడ్డ‌గోలుగా అబ‌ద్ధం ఆడుతున్నారు. బాధ్య‌త క‌లిగిన ప‌ద‌వుల్లో ఉండి ఇలాంటి ప్ర‌చారం చేయ‌డం దుర్మార్గం. మా ఐదేళ్ల పాల‌న‌లో కంటే కూట‌మి పాల‌న‌లో ఒక్క పంట‌కైనా ఎక్కువ మద్దతు ధ‌ర ప‌లికితే చూపించాల‌ని డిమాండ్ చేస్తే ఇంత‌వ‌ర‌కు అధికారప‌క్షం నుంచి స‌మాధాన‌మే లేదు.

ఇక‌నైనా వ్య‌క్తిగ‌త విమ‌ర్శ‌లు మానుకోండి
ధాన్యం ఖ‌రీఫ్‌, ర‌బీ రెండు సీజ‌న్‌లు క‌లిపి 127 నుండి 129 ల‌క్ష‌ల ట‌న్నుల ఉత్ప‌త్తి జ‌రిగితే, ట‌మాట‌, చీనీ, అర‌టి మూడు పంట‌లు క‌లిపి 150 ల‌క్ష‌ల ట‌న్నుల ఉత్ప‌త్తి జ‌రుగుతుంది. ఈ మూడు పంట‌లను ఈ ఏడాది రోడ్డు మీద పార‌బోసి రైతులు న‌ష్ట‌పోయారు. సాగువిస్తీర్ణం 18 లక్ష‌ల హెక్టార్లతో త‌క్కువే అయినా రాష్ట్ర జీఎస్‌డీపీలో అగ్రిక‌ల్చ‌ర్‌వాటా క‌న్నా హార్టీక‌ల్చ‌ర్ వాటానే ఎక్కువ‌. రాష్ట్రంలో రాయ‌ల‌సీమ హార్టీక‌ల్చ‌ర్ హ‌బ్‌గా ఉంది. ట‌మాట‌, చీనీ, అర‌టి పంట‌ల‌కు ధ‌ర‌లు లేని పరిస్థితులు చూస్తే రాయ‌ల‌సీమ‌కు ప్ర‌మాద ఘంటిక‌లు మోగిస్తున్నాయి. ఇలాంటి ప‌రిస్ధితుల్లో రైత‌న్నా వ‌స్తున్నా మీకోసం అని ప్ర‌భుత్వం ఎలా చెప్పుకుంటోంది. రైతుల‌ను క‌న్నీరుపెట్టిచే ప‌రిస్థితి కూట‌మి ప్ర‌భుత్వానికి ఎంత‌మాత్రం మంచిది కాద‌ని హెచ్చ‌రిస్తున్నాం. వాస్త‌వ ప‌రిస్థితుల‌ను ప్ర‌భుత్వం దృష్టికొస్తుంటే మా నాయ‌కుల‌పై వ్య‌క్తిగ‌త విమ‌ర్శ‌లు చేసి డైవ‌ర్ష‌న్ పాలిటిక్స్ చేస్తున్నారు. త‌మ వ‌ద్ద‌కు వ‌స్తున్న అధికారుల‌కు వాస్త‌వ పరిస్థితులే వివ‌రించాల‌ని రైతుల‌ను విజ్ఞ‌ప్తి చేస్తున్నా. వ్య‌వ‌సాయ రంగం అత్యంత ప్ర‌మాద‌క‌ర ప‌రిస్ధితుల్లో ఉంటే ప్ర‌తిప‌క్ష నాయ‌కుడిని విమ‌ర్శించ‌డానికే ఈ ప్ర‌భుత్వం ప‌రిమిత‌మైపోయింది. దేశవ్యాప్త స‌రాస‌రి సాగుక‌న్నా ఏపీలో సాగు విస్తీర్ణం గ‌ణ‌నీయంగా త‌గ్గిపోయిందని లెక్క‌లే చెబుతున్నాయి. ఇప్ప‌టికైనా వ్య‌వ‌సాయ సంక్షోభంమీద ప్ర‌భుత్వ దృష్టిపెట్టాలి.