రక్షణ, అంతరిక్ష రంగాలకు ఏపీ MSMEల దన్ను!
రాకెట్ విడిభాగాలు, అండర్వాటర్ వాహనాలు, డ్రోన్ ఎలక్ట్రానిక్స్, టైటానియం ఉత్పత్తుల తయారీలో స్థానిక సంస్థల ప్రత్యేకత
దేశ రక్షణ, అంతరిక్ష రంగాలకు అవసరమైన స్వదేశీ సాంకేతిక పరిజ్ఞానాన్ని అభివృద్ధి చేయడంలో ఏపీ MSMEలు పురోగతి సాధించడం గర్వకారణం: సీఎం చంద్రబాబు
ఆంధ్రప్రదేశ్లోని సూక్ష్మ, చిన్న, మధ్యతరహా పరిశ్రమలు (MSMEలు) దేశ రక్షణ, అంతరిక్ష రంగాలకు అవసరమైన విడిభాగాలు, స్వదేశీ సాంకేతిక పరిజ్ఞానాన్ని అభివృద్ధి చేస్తూ కీలక పాత్ర పోషిస్తున్నాయి. రాకెట్ మోటార్ కేసులు, అండర్వాటర్ వాహనాలు, డ్రోన్ ఎలక్ట్రానిక్స్, టైటానియం విడిభాగాలు, అధునాతన ఎలక్ట్రానిక్ షీల్డింగ్ వ్యవస్థల తయారీలో ప్రత్యేక నైపుణ్యాన్ని ప్రదర్శిస్తున్నాయి.
విశాఖపట్నంలో జరిగిన 31వ CII పార్ట్నర్షిప్ సమ్మిట్లో ఏర్పాటు చేసిన MSME ఎగ్జిబిషన్లో రాష్ట్ర సంస్థల సామర్థ్యాలు వెల్లడయ్యాయి. పెద్ద పరిశ్రమలు, టెక్నాలజీ కంపెనీలు, స్టార్టప్లు, చిన్న సంస్థలను ఒకే పారిశ్రామిక వ్యవస్థలోకి తీసుకురావడంపై ప్రభుత్వం దృష్టి సారించింది. రాకెట్ తయారీ సంస్థలకు అవసరమైన విడిభాగాలను సరఫరా చేసేవాటిలో అధికశాతం MSMEలేనని మంత్రి నారా లోకేశ్ పేర్కొన్నారు.
వివిధ రంగాల్లో MSMEల ప్రత్యేకత
కృష్ణా జిల్లాకు చెందిన రమేష్ ఏరోస్పేస్ సంస్థ రాకెట్ మోటార్ కేసులు, జెట్ డిఫ్లెక్టర్లు, నాజిల్ వ్యవస్థలను తయారు చేస్తోంది. DRDO, ISROలకు ఉత్పత్తులు అందిస్తోంది. విశాఖకు చెందిన ఓషియానాటిక్స్ సంస్థ అండర్వాటర్ వాహనాలు, మెరైన్ రోబోటిక్స్, సోనార్ వ్యవస్థలను అభివృద్ధి చేస్తోంది.
జూహి మెటలర్జికల్ ల్యాబ్ టైటానియం విడిభాగాలు, నౌకాదళ అవసరాలకు సంబంధించిన పరికరాలను తయారు చేస్తోంది. ఎస్ఎస్డీ పాలిమర్స్ విద్యుదయస్కాంత అంతరాయాల నుంచి ఎలక్ట్రానిక్ వ్యవస్థలను రక్షించే షీల్డింగ్ ఉత్పత్తులను రూపొందిస్తోంది. నంద్యాలకు చెందిన ప్రెసిఫాస్ట్ రక్షణ, ఆటోమొబైల్ రంగాలకు అవసరమైన ప్రెసిషన్ ఫాస్టెనర్లను సరఫరా చేస్తోంది.
జామి హైడ్రాలిక్స్ హైడ్రాలిక్, న్యూమాటిక్ పరికరాలను తయారు చేస్తుండగా, PB మాన్యుఫ్యాక్చరింగ్ టెక్నాలజీస్ CNC మెషినింగ్, ఏరోస్పేస్ విడిభాగాల తయారీలో పనిచేస్తోంది. తిరుపతికి చెందిన శ్రీ విజ్ఞాన్ టెక్నాలజీస్ డ్రోన్ ఎలక్ట్రానిక్స్, ఫ్లైట్ కంట్రోలర్లు, అటానమస్ డ్రోన్ వ్యవస్థలను అభివృద్ధి చేస్తోంది.
రూ.4,100 కోట్లతో 8 పెట్టుబడి ప్రాజెక్టులు
31వ CII పార్ట్నర్షిప్ సమ్మిట్ సందర్భంగా ఆంధ్రప్రదేశ్ ఎకనామిక్ డెవలప్మెంట్ బోర్డు రూ.4,100 కోట్ల పెట్టుబడులతో 8 అవగాహన ఒప్పందాలు కుదుర్చుకుంది. వీటి ద్వారా 6,865 మందికి ప్రత్యక్ష ఉద్యోగాలు లభిస్తాయని అంచనా.
అంతరిక్ష రంగంలో నాలుగు ప్రాజెక్టులు:
-
ఆస్ట్రోబేస్ స్పేస్ టెక్నాలజీస్: శ్రీ సత్యసాయి జిల్లాలో రూ.800 కోట్లతో రాకెట్ ఇంజిన్ పరీక్షా కేంద్రం విస్తరణ. 500 ఉద్యోగాలు.
-
బెల్లాట్రిక్స్ ఏరోస్పేస్: లేపాక్షిలో రూ.550 కోట్లతో అంతరిక్ష పరిశోధన కేంద్రం. 565 ఉద్యోగాలు.
-
హాథర్ రాకెట్స్: తిరుపతి జిల్లాలో రూ.250 కోట్లతో రాకెట్ ఇంజిన్ తయారీ, పరీక్షా కేంద్రం. 200 ఉద్యోగాలు.
-
ఎక్స్డీలింక్స్ స్పేస్ ల్యాబ్స్: విశాఖలో రూ.600 కోట్లతో ఉపగ్రహాల తయారీ కేంద్రం. 500 ఉద్యోగాలు.
ఈ నాలుగు ప్రాజెక్టుల ద్వారా రూ.2,200 కోట్ల పెట్టుబడులు, 1,765 ఉద్యోగాలు రానున్నాయి.
రక్షణ, ఏరోస్పేస్ రంగాల్లో మరో నాలుగు ప్రాజెక్టులు:
-
విజన్ ఏరోగ్లోబల్ ఎంటర్ప్రైజెస్: శ్రీ సత్యసాయి జిల్లాలో రూ.500 కోట్లతో ఏరోస్పేస్ తయారీ కేంద్రం. 2,000 ఉద్యోగాలు.
-
ఐజీ డిఫెన్స్: నెల్లూరు జిల్లాలో రూ.500 కోట్లతో క్షిపణుల అభివృద్ధి, తయారీ కేంద్రం. 1,000 ఉద్యోగాలు.
-
సాల్వో ఇండస్ట్రీస్: నెల్లూరు జిల్లాలో రూ.800 కోట్లతో పౌర, రక్షణ రంగాల తయారీ కేంద్రం. 2,000 ఉద్యోగాలు.
-
నాట్స్ ఏరోస్పేస్: రూ.100 కోట్లతో ఫ్లైట్ ట్రైనింగ్ సంస్థ. 100 ఉద్యోగాలు.
ఈ నాలుగు ప్రాజెక్టుల ద్వారా రూ.1,900 కోట్ల పెట్టుబడులు, 5,100 ఉద్యోగాలు కల్పించనున్నారు.
ఏరోస్పేస్ పాలసీతో మరిన్ని అవకాశాలు
ఆంధ్రప్రదేశ్ ఏరోస్పేస్ అండ్ డిఫెన్స్ పాలసీ 4.0 (2025-30) ద్వారా 2030 నాటికి రూ.లక్ష కోట్ల పెట్టుబడులు ఆకర్షించడం, లక్ష ఉద్యోగాలు కల్పించడం లక్ష్యంగా ప్రభుత్వం పెట్టుకుంది. శ్రీకాళహస్తిలో స్పేస్ సిటీ, పుట్టపర్తిలో ఏరోస్పేస్ పార్క్, ప్రత్యేక MSME పార్కులు, డ్రోన్ సిటీ అభివృద్ధికి ప్రణాళికలు రూపొందిస్తోంది.
రాష్ట్ర MSMEలు రక్షణ, అంతరిక్ష రంగాలకు అవసరమైన సాంకేతిక పరిజ్ఞానాన్ని అభివృద్ధి చేయడం గర్వకారణమని ముఖ్యమంత్రి చంద్రబాబు అన్నారు. పారిశ్రామికవేత్తల దూరదృష్టి దేశీయ సాంకేతిక సామర్థ్యాలను పెంచడంతో పాటు భారత్ స్వయం సమృద్ధి సాధించేందుకు దోహదపడుతుందని పేర్కొన్నారు.
రాష్ట్రంలో మౌలిక సదుపాయాలు, పెట్టుబడులు, విధానపరమైన ప్రోత్సాహంతో స్థానిక పరిశ్రమలను బలోపేతం చేసి ఆంధ్రప్రదేశ్ను రక్షణ, ఏరోస్పేస్, అంతరిక్ష రంగాల తయారీ కేంద్రంగా తీర్చిదిద్దాలని ప్రభుత్వం లక్ష్యంగా పెట్టుకుంది.

