ఎరువులపై సబ్సిడీ గారడీ.. రైతులకు ఒరిగేదేమిటి..
- బస్తాపై రూ.600 వరకు పెరిగిన ఎరువుల భారం
సబ్సిడీ పెంచామంటున్నారు.. - మరి ఎరువుల ధరలెందుకు మండుతున్నాయి..
కేంద్రానికి ఎం.వీ.ఎస్. నాగిరెడ్డి సూటి ప్రశ్న
కేంద్ర ప్రభుత్వం రబీ 2026–27 సీజన్‌కు ఫాస్ఫాటిక్, పొటాషిక్ (P&K) ఎరువుల కోసం రూ.62,370.02 కోట్ల సబ్సిడీని ప్రకటించినప్పటికీ, మార్కెట్‌లో కాంప్లెక్స్ ఎరువుల ధరలు భారీగా పెరగడం వల్ల రైతులకు వాస్తవంగా ఎలాంటి ఊరట లభించడం లేదని వైఎస్సార్ కాంగ్రెస్ పార్టీ జనరల్ సెక్రటరీ మరియు ఆంధ్రప్రదేశ్ రాష్ట్ర వ్యవసాయ మిషన్ మాజీ వైస్ చైర్మన్ ఎం. వీ. ఎస్. నాగిరెడ్డి ఒక పత్రికా ప్రకటనలో పేర్కొన్నారు. గత ఏడాదితో పోలిస్తే ఈ ఏడాది ఎరువుల బస్తాలపై రూ.385 (SSP) నుండి రూ.600 (16-20-0-13) వరకు అదనపు భారం పడిందని, దీనివల్ల ఎకరా సాగు పెట్టుబడి విపరీతంగా పెరిగిందని ఆయన వివరించారు. ఎరువుల సబ్సిడీ అసలు ఉద్దేశం రైతుల ఉత్పత్తి వ్యయాన్ని నియంత్రించి, వినియోగదారులకు ఆహార ధాన్యాలను అందుబాటు ధరల్లో ఉంచడమేనని; కేవలం బడ్జెట్ అంకెలను పెంచి చూపడం కాకుండా మార్కెట్‌లో ఎరువుల ధరలు తగ్గేలా చర్యలు తీసుకోవాలని ఆయన అభిప్రాయపడ్డారు.ఈ నేపథ్యంలో పెరిగిన కాంప్లెక్స్ ఎరువుల ధరలను తక్షణమే సమీక్షించి తగ్గించాలని, రూ.62,370 కోట్ల రబీ సబ్సిడీకి అవసరమైన నిధుల కేటాయింపుపై స్పష్టత ఇవ్వాలని నాగిరెడ్డి కేంద్ర ప్రభుత్వాన్ని డిమాండ్ చేశారు. అలాగే ఎరువుల కృత్రిమ కొరత, బ్లాక్ మార్కెట్‌ను అరికట్టడంతో పాటు, ఎరువుల యాప్‌లు మరియు డిజిటల్ ధ్రువీకరణ సమస్యలను పరిష్కరించి వాస్తవ సాగుదారులైన కౌలురైతులకు కూడా సబ్సిడీ ఎరువులు, రుణాలు, బీమా ప్రయోజనాలు అందేలా చూడాలని కోరారు. పెరుగుతున్న సాగు వ్యయాన్ని దృష్టిలో ఉంచుకుని స్వామినాథన్ కమిషన్ సిఫార్సుల మేరకు C2+50 శాతం ప్రాతిపదికన పంటలకు కనీస మద్దతు ధర (MSP) కల్పించాలని ఆయన ప్రభుత్వానికి విజ్ఞప్తి చేశారు.
ప్రధాన విషయాలు : డిమాండ్లు
సబ్సిడీ ప్రకటనలపై విమర్శ: కేంద్ర ప్రభుత్వం రబీ 2026–27 సీజన్‌కు P&K ఎరువుల కోసం రూ.62,370.02 కోట్ల సబ్సిడీ ప్రకటించినప్పటికీ, మార్కెట్‌లో ఎరువుల ధరలు భారీగా పెరగడం వల్ల రైతులకు ఎలాంటి ఊరట లభించడం లేదు.
ఎరువుల ధరల పెరుగుదల: గత ఏడాదితో పోలిస్తే ఈ ఏడాది ఎరువుల బస్తాలపై అదనపు భారం భారీగా పెరిగింది—ముఖ్యంగా 16-20-0-13 పై రూ.600, 12-32-16 పై రూ.550, 10-26-26 పై రూ.500, మరియు SSP పై రూ.385 మేర ధరలు పెరగడంతో ఎకరా సాగు పెట్టుబడి విపరీతంగా పెరిగింది.
సబ్సిడీ అసలు ఉద్దేశం: ఎరువుల సబ్సిడీ అనేది కేవలం రైతుకు ఇచ్చే రాయితీ మాత్రమే కాదు; ఇది సాగు వ్యయాన్ని నియంత్రించి, వినియోగదారులకు ఆహార ధాన్యాలు అందుబాటు ధరల్లో ఉంచడానికి మరియు దేశ ఆహార భద్రతకు తోడ్పడే ఆర్థిక విధానం.
బడ్జెట్ స్పష్టత – ధరల నియంత్రణ: కేవలం బడ్జెట్ అంకెలను పెంచి చూపడం కాకుండా, రూ.62,370 కోట్ల రబీ సబ్సిడీకి నిధులను ఎలా సమకూరుస్తారో కేంద్రం స్పష్టత ఇవ్వాలి. పెరిగిన కాంప్లెక్స్ ఎరువుల ధరలను తక్షణమే సమీక్షించి తగ్గించడంతో పాటు కృత్రిమ కొరత, బ్లాక్ మార్కెట్‌ను అరికట్టాలి.
కౌలురైతులకు న్యాయం: ఎరువుల యాప్‌లు, డిజిటల్ ధ్రువీకరణ సమస్యలను పరిష్కరించి, భూమి యజమానులతో పాటు వాస్తవ సాగుదారులైన కౌలురైతులకు కూడా సబ్సిడీ ఎరువులు, పంట రుణాలు, బీమా ప్రయోజనాలు అందేలా విధానాలు రూపొందించాలి.
స్వామినాథన్ సిఫార్సుల అమలు: పెరుగుతున్న వ్యవసాయ ఉత్పత్తి వ్యయాన్ని దృష్టిలో ఉంచుకుని, A2+50% కాకుండా డాక్టర్ స్వామినాథన్ కమిషన్ సిఫార్సుల ప్రకారం C2+50 శాతం ప్రాతిపదికన పంటలకు కనీస మద్దతు ధర (MSP) కల్పించాలి.
